سکر جو گھنٽا گھر - فاروق سومرو

سکر جو گھنٽا گھر

ٻاويھ سالن جو ٿي ويو

فاروق سومرو

انگريز دور ۾ بهترين ۽ دلڪش انداز ۾ تعمير ٿيل گهنٽا گهر کي هاڻ ۸۲ سال مڪمل ٿي ويا آهن پر سنڌ حڪومت، سکر انتظاميه توڙي چونڊيل نمائندن جي عدم دلچسپي سبب هي تاريخي گهنٽا گهر پنهنجي سونهن وڃائي ويٺو آهي، قديمي ۽ تاريخي حيثيت رکندڙ گهنٽا گهر جي چوڌاري مصروف ترين بازارون موجود آهن جتي تمام گهڻي آمد رفت هجي ٿي، ريڙها، بي ترتيب گاڏيون بيهارڻ ۽ حددخلين سبب چوڪ سوڙهو ٿي ويو آهي جنهن جي نتيجي ۾ هر وقت ٽريفڪ جام ٿيڻ معمول بڻيل آهي.

انگريز دور ۱۹۳۷ع ۾ تعمير ٿيل قديمي ۽ تاريخي گهنٽا گهر ۾ لڳل خالص ٽامي سان ٺهيل گهڙيال سبب هر ڪلاڪ تي گهنٽ وڄندو هو، جنهن جو آواز پري پري تائين آساني سان ٻڌو ويندو هو، جيڪڏهن وقت ۱۲ ٿيندو هو ته ۱۲ ڀيرا گهنٽ وڄندو هو، جنهن سان واپارين ۽ عام ماڻهن کي وقت جو پتو پوندو هو ۽ رات جي وقت آساني سان گهڙيال ۾ لڳل ڪانٽن جي چرپر (ٽڪ ٽڪ) جو آواز ٻڌي سگهبو هو، گهنٽا گهر جي چوڌاري گهڙيال لڳل هوندا هئا پر هاڻي صرف نشان وڃي بچيا آهن، تاريخي ۽ قديمي ورثي کي نقصان پهچائيندڙ ماڻهن گهڙيال جي هڪ سوئي به نه ڇڏي آهي، جنهن ڪري هاڻي ماڻهو گهنٽا گهر جي عروج واري زماني کي ياد ڪندي نظر اچن ٿا، جڏهن ته نئين نسل جا نوجوان توڙي وڏي انگ ۾ ماڻهو ان قديمي گهنٽا گهر جي اهميت ۽ اصل حالت کان به اڻ واقف آهن، جنهن ڪري هاڻي گهنٽا گهر کي گهڻو ڪري اشتهاري مهم طور استعمال ڪيو ويندو آهي جنهن تي مختلف پارٽين جي اڳواڻن جا بينر لڳل نظر ايندا آهن. جڏهن ته مختلف وقتن تي محفوظ هجڻ جا بيان به سامهون آيا آهن پر هن وقت تائين نه گهنٽا گهر جي سونهن واپس ڪرائڻ توڙي لڳل گهڙيال ٻيهر لڳرائڻ جي لاءِ سنڌ حڪومت، ضلعي انتظاميه توڙي سکر جي چونڊيل نمائندن ڪو به تحرڪ ناهي ورتو آهي.

ضرورت ان ڳالهه جي آهي ته سنڌ حڪومت، سکر مان چونڊيل نمائندن ۽ ضلعي انتظاميه کي پنهنجي تاريخي ۽ قديمي ورثي گهنٽا گهر جي سونهن واپس موٽائڻ لاءِ تڪڙا ۽ جوڳا قدم کڻڻ گهرجن. ان سان گڏ انتظاميه کي تاريخي توڙي قديمي حيثيت رکندڙ عمارتون، جايون، ٽاورز ۽ ٻين تاريخي شين کي محفوظ بڻائڻ لاءِ به جوڳا قدم کڻي اهو مثال قائم ڪرڻ گهرجي ته اسان پنهنجي تاريخ ۽ ثقافت سان واقعي به تمام گهڻي محبت ڪندا آهيون.